EHGAM sexu askapenerako erakundeak «puntu eta koma bat» jarri asmo du bere ibilbidean. «EHGAM berrirudikatzen, birpentsatzen, birformulatzen, berrarmatzen, berreratzen eta berramesten laguntzeko», KOSA —Koronabirus Osteko Sexu Askapena— hausnarketa saioa egingo dute urriaren 27tik azaroaren 6ra. Izen ematea datorren astean zabalduko dute, EHGAMen webgunean.
KOSAk hiru helburu nagusi izango ditu, ohar bidez azaldu dutenez: mahai gainean jartzea «Euskal Herriko sexu askapen mugimenduaren beharrei oso lotuta dauden gaiak»; EHGAMen ekintza politikoarekin bat egiteko deia egitea «pertsona eta subjektibitate disidente sexu-generiko guztiei» —egun antolatuta nahiz antolatu gabe daudenei—; eta EHGAMen ibilbide berria birpentsatzea. «EHGAMek puntu eta koma bat idazten du gaur bere historian, eta ziklo berri bat irekitzen du. Aro berri honetan, gure ekintza politikoak gure aurrekoen printzipio emantzipatzaile eta eraldatzaile berdinei heldu nahi die», nabarmendu dute.
Hausnarketa zikloaren egitaraua ere zehaztu dute: urriaren 27an eta 30ean eta azaroaren 4an saioak egingo dituzte Arrasaten, Hernanin (Gipuzkoa) eta Izarran (Arbaba). Ondoren, azaroaren 6an, Bilbon elkartuko dira, hausnarketa zikloa amaitzeko. Hainbat mahai inguru antolatu dituzte egun horretarako: 10:00etan, Genero disidentziak deiturikoa; 12:00etan, Kultura ez heteroarautua, eta, 15:30ean, LGBT+ euskaraz eta euskaratik: gure borroketan euskarak duen lekuaz eztabaida saioa. Azkenik «EHGAM berramesteko unea»izango dute, 17:30ean hasita.
